نكت مغربية واعرة زاز

باش كتحلم

سول الأستاذ واحد التلميد: باش كتحلم؟

قال ليه الدري: كنحلم نشد 10000 درهم ف الشهر بحال الوالد.

قال ليه الأستاذ: علاش باك كيشدهم؟

قال ليه الدري: لا، حتى هو غير كيحلم.

طلق مرتو

هادا واحد الراجل طلق مرتو، وقال ليه القاضي: غادي تبقى تعطيها النص ديال المانضة.

ناض السيد كيضحك. سولو القاضي: مالك؟

قال ليه: كانت كتديها كاملة

ما شفتينيش؟

واحد مبوق داز حدا باه ف الزنقة وميك عليه.

مشى عندو باه قال ليه: مالك ما شفتينيش؟

قال ليه المبوق: لا شفتك، غير ما عرفتش فين

طلقي راسك

هادي واحد المعلمة قالت لواحد التلميدة: صرفي الفعل مشى في المضارع.

قالت ليها التلميدة بشوية: أنا... أمشي... أنت... تمشي...

قالت ليها المعلمة: طلقي راسك شوية.

قالت ليها التلميدة: أنا أجري، أنت تجري...

صبع ف الزلافة

واحد الكليان قال للسرباي: سمح ليا، ولكن راه صبعك كان مخشي ف هاد الزلافة ديال الحريرة اللي جبتي ليا.

قال ليه السرباي: الدنيا هانية، ولا عليك، ما كانتش سخونة

أكبر كدبة

هادو جوج دراري كانوا مدابزين ف القسم.

جا الأستاد لقاهم ف ديك الحالة وسولهم: مالكم على هاد الصداع؟

قالوا ليه: لقينا 100 درهم، واتفقنا اللي قال أكبر كدبة ياخدها.

قال ليهم الأستاد: ما حشمتوش؟ أنا ملي كنت قدكم ڭاع ما كنت كنعرف أشنا هو الكدوب.

وهوما نيت يعطيوه دوك الدراري 100 درهم

تغيب على المدرسة

هادا واحد الولد ما مشاش للمدرسة. كان جدو كيطل من الشرجم، وبان ليه المعلم جاي لعندهوم للدار، وهو يمشي يجري عند الدري قال

ليه: تخبى تخبى، المعلم جا يسول عليك.

وهو يقول ليه الدري: وا تخبى نتا أجدي، راه قلت ليه جدي مات وجا يعزينا فيك.

المرا الخايفة من الشفار

هادي واحد المرا خوافة، كل ليلة كتفيق راجلها وكتقول ليه: ناري سمعت شي حس، راه كاين شفار ف الدار.

كل ليلة على هاد الحال، وراجلها عيا.

واحد النهار قال ليها: يا لالة راه الشفار إيلا بغى يشفر، ڭاع ما كيدير الحس.

الغد ليه ف الليل، فيقاتو المرا وقالت ليه: ناري ما سامعة حتى حس ف الدار!

طبيب العينين وخطيبتو

هادا طبيب ديال العينين جالس مع خطيبتو ف الجردة.

هز وردة وقال ليها: شايفة هاد الوردة؟

قالت ليه حشمانة: اه.

وهو يرجع إيديه شوية اللور، وقال ليها: ودابا؟